وزیراعظم سے ارکان قومی اسمبلی کی ملاقاتیں، مکمل اعتمادکا اظہار
 وزیراعظم عمران خان سے پاکستان تحریک انصاف (پی ٹی آئی) سے تعلق رکھنے والے ارکان قومی اسمبلی نے ملاقاتیں کی اور  وزیراعظم پر مکمل... وزیراعظم سے ارکان قومی اسمبلی کی ملاقاتیں، مکمل اعتمادکا اظہار

 وزیراعظم عمران خان سے پاکستان تحریک انصاف (پی ٹی آئی) سے تعلق رکھنے والے ارکان قومی اسمبلی نے ملاقاتیں کی اور  وزیراعظم پر مکمل اعتماد کا اظہار کیا۔

ذرائع کے مطابق ملاقاتوں میں حلقوں میں ترقیاتی منصوبوں پرپیش رفت اور سیاسی امور زیر غور آئے۔

اس موقع پر وزیراعظم کا کہنا تھا کہ پی ٹی آئی کی مقبولیت کااندازہ حالیہ جلسوں میں عوام کی شمولیت سے لگایا جاسکتا ہے، پی ٹی آئی حکومت نے ہمیشہ انصاف وقانون کی بالادستی اور غریب کی فلاح کے لیےکام کیا، حکومت نے مشکل فیصلے لے کر معیشت کو ترقی کی راہ پرگامزن کیا۔

وزیراعظم عمران خان کا کہنا تھا کہ غریب طبقےکو ریلیف فراہم کرنےکے لیے حکومت بھاری سبسڈی برداشت کر رہی ہے، ہمارے دور میں ریکارڈ ٹیکس اکٹھا کیا گیا جس کو عوامی فلاح پر ہی خرچ کیا گیا، سرکاری اخراجات میں کمی لائی گئی تاکہ وہی پیسا ترقیاتی  منصوبوں پر خرچ ہوسکے۔

ان کا کہنا تھا کہ کورونا نے بین الاقوامی معیشت کو نقصان پہنچایا تاہم ہماری حکومت کی پالیسیوں کو سراہاگیا، زراعت، تعمیرات اور بڑی صنعتوں میں اضافہ سرمایہ کار دوست پالیسیوں سے ممکن ہوسکا، حکومت تمام فیصلےملک کی بہتری اور عوام کی فلاح کو مدنظر رکھ کر لیتی ہے۔

وزیراعظم سے ملاقات کرنے والے ارکان قومی اسمبلی میں لال چند، شہنیلا روتھ، جے پرکاش، جمشیدتھامس ،چوہدری محمد عدنان، اعجازخان جازی، صاحبزادہ صبغت اللہ، محبوب شاہ، محمد بشیر خان، جنیداکبر، ملک انورتاج، ناصرخان موسیٰ زئی، صالح محمد، مجاہد علی، شہریار آفریدی، ملک فخرزمان خان، خرم شہزاد، روبینہ جمیل، راحت امان اللہ بھٹی، ملک کرامت علی کے علاوہ رائے مرتضیٰ اقبال، ظہور حسین قریشی اور وزیر سیفران صاحبزادہ محبوب سلطان شامل تھے۔

alphanew